طلب أحدهم الشاعر جمال اللميع الدهمشي بان يصف الذئب في قصيدة
فأتت هذه الرائعة


وشلون ذيب ٍ ينشد الذيب عن ذيب
يابو سعد وشلون هذا السوالي

هذا سوالك كان تبغاني اجيب
الذيب مثلك ياعريب الخوالي

الذيب يقنب فوق روس المراقيب
صيده من الجزلات ماهي هزالي

ينطح سمين الضان ما يحشم النيب
ياكل ويترك للكلاب التوالي

في كل ليلة لا سرى له معازيب
ماهو من اللي لا اسهب الليل خالي

لامن عوى لاتامنه بالعواقيب
مايقنب الامن ورى سو حالي

واحذر ليا زدته جروح ٍ معاطيب
الموت كان ان احمر اللون سالي

الذيب رمزا للرجال الاشانيب
تضرب به الامثال بين الرجالي

الذيب برأه الذي يعلم الغيب
في محكم التنزيل مابه جدالي

مضرب مثل في حضرة الرجل لا هيب
وياكثر منهم يسهرون الليالي

لكن قليل اللي لوصفه تقاريب
وش عاد لو هو يملكون الريالي

ماهي شجاعة كثرة المال بالجيب
ولا هي ردى لاقيل مافيه مالي

خطو الولد يارد على مورد الطيب
يشيل ما شالت ظهور الجمالي

لو هو فقير ٍ ما يكب المواجيب
سفر ٍ ليامن جيت مثل الهلالي

وخطو الولد كله عيوب وعذاريب
مايمته يمنى ولا هي شمالي

مثله مثل بالضبط صفر العراقيب
ياجعل ماله بين الاشناب والي

هذا جواب الذيب بمسائل الذيب
سلام وازبن يالفتى كل عالي
منقوول للأماانة